Заледена улица причина за сообраќајката во Зелен Рид, тврди таткото на возачот

Подледена улица, а не брзо возење е причина за сообраќајната несреќа која на Нова година се случи на раскрсницата на улиците Трета МУБ и Бранко Богдански - Гуцман, тврдат родителите на момчето кое го управувало Голфот.

Тие го обвинуваат ЈП „Водовод“, дека дозволиле вода од пукната цевка, која течела 2-3 дена да се заледи на улицата, бидејќи не го отстраниле дефектот навреме, а не поставиле ни предупредувачки знак дека коловозот е влажен, па со тоа ја загрозила безбедноста на возачите.

„Мојот син не возел брзо. Пред него излетало и друго возило, а имам информации дека и предходниот ден имало пролизгување, бидејќи коловозот бил заледен. Никаде немало предупредување за опасноста. Откако се случиле несреќите наредниот ден од „Водовод“ посипале песок по улицата и почнале да го отстрануваат дефектот“, - вели Сашо С., татко на возачот.

Од ЈП „Водовод“ тврдат дека тие немале информација дека има пукната цевка на тој дел од градот и кај нив дефектот бил пријавен од МВР на 1 јануари во 2.40 часот, 40 минути откако се случила сообраќајката. 

„Водата била од 100 до 150 метри од местото на несреќата и течела во сливник на улицата Трета МУБ. Веднаш била испратена екипа која го затворила вентилот, а утрината наша екипа излегле на терен и го отстранила дефектот. Полицискиот извештај ќе покаже што точно се случувало“, - велат од „Водовод“.

Сообраќајната несреќа во која се повредени две лица се случи на новогодишната ноќ во 2 часот по полноќ, кога М.С. (25) од Куманово управувајќи патничко моторно возило Голф со кумановски регистарски ознаки изгубил контрола над возилото, излетал од патот и удрил во дрвен столб за пренос на електрична енергија и во оградата од куќа, соопшти МВР.

Момчето и девојката кои беа повредени се чувствуваат добро и поминале со полесни повреди, кажуваат родителите.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk