Зачленете се во нашиот клуб на читатели и најновите текстови ќе ги добивате на вашата мејл адреса
Приватната фирма што го доби тендерот за модернизација и одржување на јавното осветлување во Општина Куманово започна со имплементација на проектот.
Вчера се поставени првите лед светилки во селата Брзак и Агино село, а потоа следуваат селата Романовце, Уминдол, Ново Село и Љубодраг.
„Паралелно ќе оди замената на постоечките светла во градот и приградските населби.Во следните четири месеци ќе бидат заменети околу десет илјади постоечки светлечки тела на територијата на целата Општина. Добиваме квалитетно осветлување, енергетска ефикасност и намалено затоплување и емисија на цо2 гасови“, - објави градоначалникот Максим Димитриевски.
Секој столб ќе биде означен со сериски број, локација и контакт телефон за пријавување на евентуален дефект.
Со тоа започнува практична примена на јавно-приватно партнерство на „ИЦС системи“ од Прага, со подружница во Охрид, со Општина Куманово, која го доби тендерот за модернизација и одржување на јавното осветлување во градот.
Компанијата треба да вложи 4,7 милиони евра во осовременување и модернизација на системот на осветлување на 9.340 светлечки места, а со него ќе стопанисува 10 години.
Досега со осветлувањето стопанисуваше ЈП „Куманово-паркинг“, а ова е прво јавно-приватно партнерство во Општина Куманово.
Потребата од јавно-приватно партнерство градоначалникот Максим Димитриевски ја правдаше со неможноста Oпштината и ЈП „Куманово-паркинг“ да одвојат доволно средства за одржување на јавното осветлување, поради што граѓаните постојано се жалат на квалитетот на услугата.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk