Зачленете се во нашиот клуб на читатели и најновите текстови ќе ги добивате на вашата мејл адреса
Со изложба на фотографии и целовечерен концерт во Центарот за култура, синоќа започна одбележувањето на големиот јубилеј 90 години постоење и успешна работа на КУД „Панче Пешев„ Куманово.
Посетителите имаа можност преку сликите да се запознаат со најзначајните настапи на играорците во земјава и странство, во изминатите 9 децении.
„Имаме фотографии од 1946 до 2006 година. Тоа се фотографии и слики кои се направени со Народен музеј Куманово, што ги чуваме, што велат кумановци, како „очи во глава“. За последните 10 години имаме околу педесетина фотографии од најдобрите настапи во европските градови, односно на фестивалите низ Европа. Има доста признанија, награди и плакети, неколку носии од Куманово. Во последните години без разлика на проблемите што ги имавме, успејавме да го презентираме кумановскиот и македонскиот фолклор, како во земјава така и надвор од неа, - изјави Мирослав Крстевски, претседател на КУД „Панче Пешев„.
По завршување на изложбата се одржа целовечерен концерт на културно-уметнички друштва од Скопје, Битола, Горњи Милановац, Барна и домаќините. Пред почетокот на манифестацијата низ улиците на градот имаше дефиле на учесниците.
Прославата на 90 години КУД „Панче Пешев„ продолжува вечерва во 18.00 часот со промоција на монографија и Свечена академија.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk