Започнува првата фаза од реконструкцијата на „Моша Пијаде“

Започнува првата фаза од реконструкцијата на улицата „Моша Пијаде“ од Куманово, во која ќе се работи на замена на водоводната и фекално- канализациската мрежа.

Во раните утрински часови се уште не беше воведен времен режим на сообраќај, а присутните работници, ангажирани од изведувачот, не знаеја дали улицата ќе се затвори за сообраќај, или тој ќе се одвива по една лента.

„Постоечката водоводно- канализациска мрежа е постара од 50 години, па затоа е императив да биде заменета. Ќе се работи и на останатата подземна инфраструктура, договорот предвидува дека 10 години по завршување на проектот и ставање во употреба не смее ништо да се работи на таа улица“, информираат од Одделението за меѓународна соработка и евроинтеграции.

Проектот е на Министерството за транспорт и врски и Светската банка, во соработка со локалната самоуправа.

Надлежните најавуваат дека по завршување на сите активности Куманово ќе добие модерна, современа улица, со комплетно урбано уредување по мера на граѓаните.

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk